தலித் மக்களுக்கு நம் பிக்கை ஏற்படுத்திய மாவட்ட ஆட்சியரின் போராட்டத்தை, தீண்டாமை ஒழிப்பு முன்னணி பாராட்டியது.
விருதுநகர் மாவட்டம், காரியாபட்டி அருகே உள்ளது டி.வேப்பங்குளம் கிராமம். இங்கு கடந்த அக்டோபர் மாதம் கலைஞர் காப்பீட்டுத் திட்டத்திற்காக புகைப்படம் எடுக்கப்பட் டது. அப்போது புகைப்படம் எடுக்க வந்த தலித் மக்களை சாதி ஆதிக்க சக்தியினர் நீண்ட நேரம் காத்திருக்க வைத்துள்ளனர். அப்போது தலித் பிரிவை சேர்ந்த ஒருவர் “எங்களை ஏன்? நீண்ட நேரம் காத்திருக்க வைக்கிறீர்கள்” என கேட்கவே, சாதி ஆதிக்க வெறியர்கள், தலித் மக்களை கடுமையாக தாக்கினர். இதையடுத்து தலித் மக்கள் அனைவரும் குடும்பத்துடன் ஊரையே காலி செய்து அருகில் உள்ள சின்ன காரியாபட்டியில் தங்கினர்.
இப்பிரச்சனையில் நியாயம் கிடைக்க வலியுறுத்தி தமிழ்நாடு தீண்டாமை ஒழிப்பு முன்னணி, மார்க்சிஸ்ட் கம்யூனிஸ்ட் கட்சி, விடுதலைச் சிறுத்தைகள் மற்றும் சாதி ஒழிப்பு முன்னணி போன்ற அமைப்புக்கள் போராட்டம் நடத்தின.
இந்நிலையில் டி.வேப்பங்குளத்தில் சமாதானக் கூட்டத்திற்கு மாவட்ட ஆட்சித் தலைவர் ஏற்பாடு செய்தார். புதன்கிழமை மாலை, அக்கிராமத்திற்கு சென்று இரு தரப்பினரையும் அழைத்து பேச்சுவார்த்தை நடத்தினார். அப்போது மனோகரன் என்பவர், “எத்தனை சமாதானக் கூட்டம் நடத்தினாலும் உங்களைச் சும்மா விட மாட்டோம்” என ஆட்சியர் முன்னிலையிலேயே தலித் மக்களை பகிரங்கமாக மிரட்டினார்.
அப்போது தலித் மக்கள், “உங்கள் முன்பே, இப்படி மிரட்டினால் நாங் கள் என்ன செய்வது; எப்படி அமைதியாக வாழ முடியும்?” என ஆட்சியரிடம் கேட்கவே, உடனே, மாவட்ட ஆட்சியர் சிஜி தாமஸ் வைத்யன், தலித் மக்களை மிரட்டிய, சாதிவெறியன் மனோகரனை கைது செய்ய உத்தர விட்டார். இந்நிலையில் மனோகரன் அங்கிருந்து தப்பிவிடவே, அவரைக் கைது செய்யும் வரை ஊரை விட்டுப் போகமாட்டேன் என ஆட்சியர் அங்கேயே தர்ணா போராட்டத்தில் ஈடுபட்டார். பல மணி நேரத்திற்கு பின்பு குற்றவாளி கைது செய்யப்பட்ட பின்னரே ஆட்சியர் அங்கிருந்து சென்றார்.
இச்சம்பவம் குறித்து தமிழ்நாடு தீண்டாமை ஒழிப்பு முன்னணியின், விருதுநகர் மாவட்ட அமைப்பாளர் கே.சாமுவேல்ராஜ் விடுத்த அறிக்கையில், (3.12.09) "தலித் மக்களுக்கு நம்பிக்கை ஊட்டும் வகையில் மாவட்ட ஆட்சியர் செயல்பட்டதை தீண்டாமை ஒழிப்பு முன்னணி பாராட்டுகிறது; மேலும், நரிக்குடி ஒன்றியம் இருஞ்சிறை கிராம வழக்கில் மாவட்ட ஆட்சித் தலைவர் உயர்நீதிமன்றத்திற்கு சென்று அக்கிராமத்தில் தீண்டாமை உள்ளது என வெளிப்படையாக வாக்குமூலம் அளித்ததையும் பாராட்டுகிறோம் என்று குறிப்பிட்டார்.
