தமிழகத்தில் தீண்டாமைக் கொடுமைகள்: தேசிய ஆணையத்திடம் முறையீடு

தமிழகத்தில் தீண்டாமைக் கொடுமைகள் குறித்து தாழ்த்தப்பட்ட மக்களுக்கான தேசிய ஆணையத்திடம் தீண் டாமை ஒழிப்பு முன்னணி முறையீடு செய்தது.
பூட்டாசிங் தலைமையிலான தாழ்த்தப்பட்ட மக்களுக்கான தேசிய ஆணையம் வியாழனன்று (18.2.2010) சென்னைக்கு வருகை தருவதாக அறிவித்திருந்தது. பூட்டா சிங் வர இயலாத நிலையில், அதன் துணைத்தலைவர் தலைமையில் ஆணையம் வருகை தந்தது. பல தலித் அமைப்புகளின் தலைவர்கள், சட்டமன்ற உறுப்பினர்கள், முன் னாள் நாடாளுமன்ற-சட்டமன்ற உறுப்பினர்கள் உட்பட ஏராளமானவர்கள் ஆணையத்தை சந்திக்க வந்திருந்தனர்.
தமிழ்நாடு தீண்டாமை ஒழிப்பு முன்னணியின் சார்பில் மாநில அமைப்பாளர் பி.சம்பத், சட்டமன்ற உறுப் பினர்கள் எஸ்.கே.மகேந்திரன், பி.டில்லிபாபு, ஜி.லதா ஆகியோர் சென்றனர்.
பல அமைப்புகள் சார் பாக ஆணையத்திடம் ஏராளமான முறையீடு களும், மனுக்களும் அளிக் கப்பட்டன. ஆலோசனை யை வரவேற்றுப் பேசிய ஆணையத்தின் உபதலைவர் இந்தியாவில் தீண்டாமை சட்டப்பூர்வமாக ஒழிக்கப்பட்டு விட்ட நிலையில், “தீண்டாமை ஒழிப்பு முன்னணி” போன்ற அமைப்புகள் செயல்படுவது பற்றி வியப்புடன் வினவினார்.
தமிழ்நாடு தீண்டாமை ஒழிப்பு முன்னணி சார்பில் ஆணையத்திடம் விரிவான மனு அளிக்கப்பட்டது. அப்போது பேசிய மாநில அமைப்பாளர் பி.சம்பத், “தமிழ்நாட்டில் ஏராளமான வடிவங்களில் பல்லாயிரம் கிராமங்களில் தீண்டாமைக் கொடுமைகள் நீடிப்பதாகவும், தமிழ்நாடு தீண்டாமை ஒழிப்பு முன்னணி மற்றும் தலித் அமைப்புகள், ஜனநாயக அமைப்புகள் அவற்றை ஒழிப்பதற்காகவும், அரசை நிர்ப்பந்திப்பதற்காகவும் போராட்டங்களை நடத்த வேண்டிய தேவை இருப்பதாகவும் குறிப்பிட்டார்.
ஜி.லதா
சட்டமன்ற உறுப்பினர் ஜி.லதா பேசும்போது, “விழுப்புரம் மாவட்டம் காங்கியனூர் திரௌபதியம்மன் கோவிலுக்கு தலித் மக்களை அழைத்துச் செல்லும் போது மாவட்ட காவல்துறை கண்காணிப்பாளர் அமல்ராஜ் தலைமையிலான காவல்துறையினர் தன்னை கொடூரமாகத் தாக்கி காயப்படுத்தியதையும், இதர தலித் மக்கள் தாக்கப்பட்டதையும் உணர்ச் சிப்பூர்வமாக எடுத்துக்கூறி, அமல்ராஜ் மீது வன்கொடுமைத் தடுப்புச் சட்டப்படி நடவடிக்கை எடுக்க வேண்டும்” என வற்புறுத்தினார்.
தலித் மக்கள் தொகைக்கு ஏற்ப இடஒதுக்கீட்டை 18 சதவீதத்திலிருந்து 19 சதவீதமாக உயர்த்துவது, தலித் - பழங் குடி மக்களுக்கான ஆணையம் ஒன்றை தேசிய ஆணையம் போல உரிய அதிகாரம் வழங்கி அமைப்பது, தமிழக அரசு மற்றும் பொதுத்துறை நிறுவனங்களில் பல்லாயிரம் பின்னடைவுக் காலியிடங்களை நிரப்புவது, தலித் உப திட்டத்திற்கு மத்திய, மாநில அரசுகள், மக்கள் தொகைக்கு ஏற்ப நிதி ஒதுக்காதது, ஒதுக்கிய நிதியில் மாநில அரசு முறை யாகச் செலவிடாதது, உத்தப்புரத்தில் ஆதிக்க சக்திகள் நிர்ப்பந்தம் காரணமாக டி.கே.ரங்கராஜன் எம்.பி., நிதி ஒதுக்கியும், தமிழக அரசு பேருந்து நிறுத்த நிழற்குடை அமைத்துத்தர மறுப்பது, உத்தப்புரத்தில் தலித் மக்களை அரசமர வழிபாட்டிற்கு அனுமதி மறுக்கும் நிலை தொடர்வது, அருந்ததியர் உள்ஒதுக்கீடு உத்தரவை வேலை வாய்ப்பில் முழுமையாக தமிழக அரசை அமல்படுத்தக் கோருவது, மனித மலத்தை மனிதன் அள்ளும் கொடுமைக்கு தமிழகத்தில் முடிவு கட்டுவது, வன்கொடுமைத் தடுப்புச் சட்டங்களை தமிழகத்தில் உறுதியுடன் அமல்படுத்தக் கோருவது, திண்டுக்கல் மாவட்டம் பாலசமுத்திரம் கிராமத்தில் தலித் மக்கள் சுடுகாட்டிற்கு பாதை இல்லாததால், பிணத்துடன் ஆற்றில் நீந்தி அடக்கம் செய்யப்படும் கொடுமைக்கு முடிவு கட்டி, பாலம் அமைத்துக் கொடுப்பது அல்லது மாற்று சுடுகாடு ஏற்பாடு செய்து தருவது போன்ற கோரிக்கைகள் மனுவாகவும், நேரடியாகவும் தமிழ்நாடு தீண்டாமை ஒழிப்பு முன்னணியால் ஆணையத்திடம் அளிக்கப்பட்டது.
.இப்பிரச்சனைகள் மீது உரிய நடவடிக்கைகள் எடுப்பதாக ஆணையம் சார்பில் தெரிவிக்கப்பட்டது.

தீண்டாமை ஒழிப்பு முன்னணி தூத்துக்குடி மாவட்டத்தில் அமைப்பு

தமிழ்நாடு தீண்டாமை ஒழிப்பு முன்னணியின் தூத்துக்குடி மாவட்ட அமைப்புக் கூட்டம், தூத்துக்குடியில் நடைபெற்றது.

கூட்டத்திற்கு முன்னணியின் மாநிலக்குழு உறுப்பினர் ஆர்.ரசல் தலைமை வகித்தார். மார்க்சிஸ்ட் கட்சியின் மாவட்டச் செயலாளர் கனகராஜ் வாழ்த்துரை வழங்கினார். 70 பேர் கொண்ட அமைப்புக்குழு, கூட்டத்தில் தேர்வு செய்யப்பட்டது. மார்க்சிஸ்ட் கம்யூனிஸ்ட் கட்சியின் மாவட்ட செயற்குழு உறுப்பினர் பி.இசக்கிமுத்து, தீண்டாமை ஒழிப்பு முன்னணியின் மாவட்ட அமைப்பாளராக தேர்வு செய்யப்பட்டார்.

கழுகுமலை வேலாயுதபுரம் கிராமத்தில் இலவச டி.வி. மறுக்கப்பட்டுள்ள 13 அருந்ததியர் குடும்பங்களுக்கு மாவட்ட நிர்வாகம் தலையிட்டு உடனடியாக இலவச டி.வி. வழங்க வேண்டும், தூத்துக்குடி மாவட்டத்தில் தீண்டாமை நிலவும் கிராமங்களை கண்டறிந்து மாவட்ட நிர்வாகம் நடவடிக்கை எடுக்க வேண்டும்; அலட்சியம் காட்டும்பட்சத்தில் தீண்டாமை ஒழிப்பு முன்னணி போராட்டம் நடத்தும் என்று தீர்மானம் நிறைவேற்றப்பட்டது.

மாநில அமைப்பாளர் பி.சம்பத் பேசுகையில், இரட்டை டம்ளர், சலூன்களில் இரண்டுசேர், சலவையகத்தில் இரண்டு பீரோ, கோயிலில் நுழைய அனுமதி மறுப்பு, பொது மயானப் பாதை போன்ற பல பிரச்சனைகள் மாவட்டத்தில் நிலவும் நிலையில், அவற்றுக்கு எதிரான போராட்டங்களை நடத்துவோம் என்றார்.

தீண்டாமைக் கொடுமைகளுக்கு எதிராக விழுப்புரத்தில் ஆர்ப்பாட்டம்

விழுப்புரம் மாவட்டத்தில் தொடர்ந்து நடைபெற்று வரும் தீண்டாமைக் கொடுமைக்கு எதிராக தமிழ்நாடு தீண்டாமை ஒழிப்பு முன்னணி சார்பில் மாவட்ட ஆட்சியர் அலுவலகம் முன்பு கண்டன ஆர்ப்பாட்டம் நடைபெற்றது.

ஆண்டவனுக்கு அருகே நின்று பூஜை செய்யும் உரிமையை திமுக அரசு பெற்றுத் தந்துள்ளது என்று தமிழக முதல்வர் கூறியுள்ளார். ஆனால் அந்த அறிவிப்பிற்கு நேர் எதிராக கடந்த ஆண்டு செப்டம்பர் 30-ம் தேதி விழுப்புரம் மாவட்டம் திருக்கோ விலூர் வட்டம் காங்கியனூரில் நடைபெற்றுள்ளது. தலித் மக்களைத் திரட்டி ஆலய நுழைவுக்கு சென்ற தீண்டாமை ஒழிப்பு முன்னணியினர் மற்றும் சிபிஎம் தலைவர்களைத் தடுத்து நிறுத்தியதோடு காவல்துறையினர் தடியடியும் நடத்தியுள்ளனர்.

இந்த சம்பவத்தில் மாவட்ட காவல்துறை, வருவாய் துறையினர் மீது வன்கொடுமை தடுப்புச் சட்டத்தின் கீழ் வழக்குப்பதிவு செய்து உரிய நடவடிக்கை இதுவரைக்கும் எடுக்கப்படவில்லை. ஆனால் உரிமையை நிலைநாட்டச் சென்றவர்கள் மீது பொய் வழக்கு போட்டுள்ளனர்.

கல்வராயன்மலை, வாரம் ஊராட்சி மன்ற உறுப்பினர் தி.தேவராஜ் பழங்குடி இனத்தை சார்ந்தவர். இவரது படுகொலையில் உண்மை குற்றவாளி கைது செய்யப்படவில்லை. பாணப்பட்டு கிராமத்தில் தலித் இளைஞர் பி.சிவபாலன் கொலையை காவல்துறையே தற்கொலை என திசை திருப்புகிறது.

எனவே, காங்கியனூரில் போடப்பட்டுள்ள பொய் வழக்கை திரும்பப் பெற வேண்டும்; தேவராஜ் படுகொலையில் உண்மை குற்றவாளிகள் உடனடியாக கைது செய்யப்பட வேண்டும்; சிவபாலன் கொலைச் சம்பவத்தில் சிபிசிஐடி விசாரணைக்கு உத்தரவிட வேண்டும்; சிறப்பு உட்கூறு திட்டத்தின் கீழ் வழங்கப்படும் நிதியை முழுமையாக தலித் மற்றும் பழங்குடியின மக்க ளுக்கே செலவிட வேண்டும் என்றும் இந்த ஆர்ப்பாட்டத்தில் வலியுறுத்தினர்.

தீண்டாமை ஒழிப்பு முன்னணி மாநில அமைப்பாளர் பி.சம்பத் கண்டன உரையாற்றினார். ஆர்.ராமமூர்த்தி சாரங்கன் (வழக்கறிஞர் சங்கம்), ஜி.ஆனந்தன் (சிபிஎம்), சி.நிக்கோலஸ் (அம்பேத்கர் பேரவை), எல்.யேசுமரியான் (அம்பேத்கர் நூற்றாண்டு இயக்கம்), ஏ.கோதண்டம் (பார் கவுன்சில்), வி.உதயகுமார், பி.குமார் (சிஐடியு), டி.ஏழுமலை, ஆர்.தாண்டவராயன், என்.சுப்பிரமணியன் (விவசாயிகள் சங்கம்), கே. கலியன், பி.சுப்பிரமணியன் (விதொச), ஆர்.கண்ணப்பன், எம்.செந்தில் (வாலிபர் சங்கம்), ஏ.சக்தி, எஸ்.கீதா (மாதர்), ஜெ.முகமது அனஸ், யு.கார்க்கி (மாணவர்), ஆர்.மதி (அருந்ததியர் சங்கம்) மற்றும் பலர் பேசினர். தீண்டாமை ஒழிப்பு முன்னணியின் மாவட்ட அமைப்பாளர் முத்துக்குமரன் தலைமை வகித்தார்.

தலித் மக்களுக்கான சிறப்பு நிதியை முறையாக செலவிடாத புதுவை அரசு

தீண்டாமை ஒழிப்பு முன்னணியின் ஆலோசனைக்குழு கூட்டம், எல்.கலிவரதன் தலைமையில் நடைபெற்றது. முன்னணியின் புதுவை அமைப்பாளர் ஜி.ராமசாமி, நிர்வாகிகள் ராஜாங்கம் நிலவழகன், கொளஞ்சியப்பன்-தவமணி, லெனின், முருகன் உள்ளிட்டோர் கலந்து கொண்டனர்.

இக்கூட்டத்தில், சிறப்பு உட்கூறு திட்ட நிதியை புதுச்சேரி மாநில காங்கிரஸ் அரசு முறையாக செலவு செய்யாமல் வேறு திட்டங்களுக்கு திருப்பி விடுவதற்கு கண்டனம் தெரிவிக்கப்பட்டது.

புதுச்சேரி அரசு ஒவ்வொரு ஆண்டும் கூடுதலாக மத்திய அரசிடம் நிதிபெற்று திட்டமிட்டு செலவிடுவதாக பெருமையடித்துக் கொள்கிறது. ஆனால் திட்ட நிதியை, உரிய காலத்தில் முறையாக செலவு செய்வதில்லை என மாநில பொதுக்கணக்குக் குழு புதுச்சேரி அரசு மீது குறைகூறியுள்ளது. இது ஒவ்வொரு ஆண்டும் நடக்கிறது. இந்தப் போக்கு பட்ஜெட், திட்டம், நிதி ஒதுக்கீடு அரசின் செயல்பாடு ஆகியவை கேள்விக்குறி ஆகியுள்ளது.

மேலும், ஆதிதிராவிட நலத்துறைக்கு ஒதுக்கப்பட்டுள்ள நிதியில் 8.32 சதவீதம் மட்டுமே செலவு செய்யப்பட்டுள்ளதாக தெரிகிறது. மேலும் திட்ட நிதியில் 4.52 சதவீதம்தான் தலித் மக்களுக்கு சென்றிருக்கிறது. இது, தலித் மக்களின் வளர்ச்சியில் புதுவை அரசு கொண்டிருக்கும் அலட்சியமான பார்வையை அம்பலப்படுத்தியுள்ளது என்றும் சுட்டிக்காட்டப்பட்டதோடு, புதுச் சேரி காங்கிரஸ் அரசும், தலித் சார் துறையும் உடனடியாக மக்களுக்கு தெளிவுபடுத்த வேண்டும் என்றும் வலியுறுத்தப்பட்டது.

எஞ்சிய சில மாதங்களில், திட்டத்தின் 95 சதவீத நிதியை செலவு செய்யும் வாய்ப்பே இல்லை. அவ்வாறு அவசர கதியாக செலவு செய்யுமேயானால் பெரும் ஊழல் நடைபெற வாய்ப்புள்ளது. எனவே, எச்சரிக்கையோடும் முறைகேடுகள் இன்றி தலித் மக்களுக்கான திட்ட நிதியை செலவிட வேண்டும் என்றும் கோரிக்கை விடப்பட்டது.

கரையாம்பத்தூர் பகுதியில் ஆண்டாண்டு காலமாக நூற்றுக்கும் மேற்பட்ட தலித்மக்கள் சிறுசிறு பகுதியில் விவசாயம் செய்து வரும் நிலையில், அத்தகைய நிலங்களை அம்மக்களுக்கே பட்டா செய்து தரவேண்டும் என்றும் இந்த கூட்டத்தில் வலியுறுத்தப்பட்டது.

-(19.12.2009 அன்று செய்தியானது)

உள்ஒதுக்கீடு: உயர்நீதிமன்ற தீர்ப்பிற்கு தீண்டாமை ஒழிப்பு முன்னணி வரவேற்பு

இடைநிலை ஆசிரியர் நியமனத்தில் அருந்ததியருக்கான உள் ஒதுக்கீட்டை நடைமுறைப்படுத்த வேண் டுமென சென்னை உயர்நீதிமன்றம் வழங்கியுள்ள தீர்ப்பு, சமூக நீதியை உயர்த்திப் பிடிப்பதாக உள்ளது என்று தீண்டாமை ஒழிப்பு முன்னணி வரவேற்றது.

முன்னணியின் மாநில அமைப்பாளர் பி.சம்பத் விடுத்த அறிக்கையில் கூறப்பட்டிருந்ததாவது:

இடைநிலைப் பள்ளி ஆசிரியர்கள் நியமனத்தில் அருந்ததியினருக்கான உள்ஒதுக்கீட்டை நடைமுறைப்படுத்த வேண்டுமென்று சென்னை உயர்நீதிமன்றம் உத்தரவிட்டுள்ளது. அருந்ததிய மக்களுக்கான உள்ஒதுக்கீடு என்ற நீண்ட கால கோரிக்கை மார்க்சிஸ்ட் கம்யூனிஸ்ட் கட்சி, தமிழ்நாடு தீண்டாமை ஒழிப்பு முன்னணி மற்றும் அருந்ததிய அமைப்புகளால் முன்வைக்கப்பட்டு தமிழக அரசால் ஏற்றுக் கொள்ளப்பட்டது.

இதற்கான அரசாணை 2009 ஏப்ரல் 29 அன்று வெளியிடப்பட்டது. இந்த ஆணை வெளிவருவதற்கு முன்பாக 5 ஆயிரத்து 773 இடைநிலை ஆசிரியர்களைத் தேர்வு செய்வதற்கான அறிவிப்பாணை வந் திருந்தது. உள்ஒதுக்கீடுக்கான அரசாணை வந்தபோது அந்தப் பணியிடங்களை நிரப்புவதற்கான வேலைகள் நிறைவு பெறவில்லை. இதனால் பல ஆண்டுகளாக நீடித்து வந்த சமச்சீரற்ற நிலையைப் போக்குவதற்காக வந்த உள்ஒதுக்கீடு இந்த ஆசிரியர்கள் பணி நியமனத்திலும் வழங்கப்பட வேண்டும் என்ற நியாயமான கோரிக்கை எழுந்தது.

மார்க்சிஸ்ட் கம்யூனிஸ்ட் கட்சியின் மாநிலச் செயலாளர் என்.வரதராஜன், இந்தக் கோரிக்கையை வலியுறுத்தி முதல்வர் கருணாநிதிக்கு கடிதமும் எழுதினார். ஆனால் அரசாணை வெளியிடப்படுவதற்கு முன்பாக ஆசிரியர் பணியிடங்களை நிரப்புவதற்கான வேலைகள் துவங்கிவிட்டதால் இந்த உள்ஒதுக்கீட்டை அதில் நடைமுறைப்படுத்த முடியாது என்று அரசிடமிருந்து பதில் வந்தது.

தற்போது வந்துள்ள உயர்நீதிமன்றத் தீர்ப்பு அரசின் நிலையை நிராகரித்துள்ளது. உயர்நீதிமன்றத்தின் இந்த மேலான தீர்ப்பால் உள்ஒதுக்கீட்டின் அடிப்படையில் 173 அருந்ததியர்கள் உடனடியாக இடைநிலை ஆசிரியப் பணியில் அமருவார்கள். சமூக நீதியை உயர்த்திப் பிடித்துள்ள இந்தத் தீர்ப்பை தமிழ்நாடு தீண்டாமை ஒழிப்பு முன்னணி வரவேற்கிறது. தீர்ப்பை முழுமையாக நடைமுறைப்படுத்துமாறு மாநில அரசை தீண்டாமை ஒழிப்பு முன்னணி வலியுறுத்துகிறது.

மின்வாரியத்தில் தொழில்நுட்ப உதவியாளர் பணி நியமனத்தில் அருந்ததியருக்கான உள் ஒதுக்கீட்டை அமல்படுத்தக்கோரி நீதிமன்றத்தில் மனு, தாக்கல் செய்யப்பட்டுள்ளது. மின்வாரியத்தில் நடக்கும் நியமனத்தில் உள்ஒதுக்கீடு குறித்து மின்வாரியத்தின் சார்பில் ஆஜரான வழக்கறிஞர் தெரிவித்துள்ளார். இந் நிலையில் மின்வாரிய நியமனங்களிலும் அருந்ததியருக்கான உள்ஒதுக்கீடு நடைமுறைப்படுத்தப்படுவதை அரசு உறுதி செய்ய வேண்டும்.

மேலும் அரசாணை வெளிவந்ததற்குப் பின்னர், இதேபோன்று இதர துறைகளில் காலிப்பணியிடங்கள் நிரப்பும் பணி தொடங்கியிருப்பின், அத்துறைகளிலும் அருந்ததியினருக்கு உள்ஒதுக்கீடு முறையில் காலிப் பணியிடங்களை நிரப்ப அரசு உத்தரவிட வேண்டுமென தீண்டாமை ஒழிப்பு முன்னணி வலியுறுத்துகிறது.

தமிழக அரசு, உயர்நீதிமன்றம் வழங்கியுள்ள தீர்ப்பின் மீது மேல்முறையீடு செய்திடாமல் தீர்ப்பை உடனடியாக நடைமுறைப்படுத்திட வேண்டுமென அரசை தீண்டாமை ஒழிப்பு முன்னணி வலியுறுத்துகிறது.

இவ்வாறு அந்த அறிக்கையில் கூறப்பட்டிருந்தது. (17.12.09)

செய்யூர் அருகே தலித் மக்கள் மீது தாக்குதல்

காஞ்சிபுரம் மாவட்டம், செய்யூர் அருகே உள்ளது பரசநல்லூர் கிராமம். இங்கு தாழ்த்தப்பட்ட மற்றும் பிற்படுத்தப்பட்ட மக்களிடையே தேர்தல் முன்விரோதம் இருந்து வருகிறது.

தேர்தலின் போது தாழ்த்தப்பட்ட இனத்தைச் சேர்ந்த ஒருவர் ஏஜெண்டாக இருந்தார் என்பதற்காக ஆதிக்க சாதியை சேர்ந்த ஜெய்சங்கர் என்பவரின் தூண்டுதலின் பேரில் தாக்குதல் நடத்தப்பட்டது.

அதைத்தொடர்ந்து ஆதிக்க சாதியினர் மீது நடவடிக்கை எடுக்கக்கோரி தலித் மக்கள் கடந்த சில மாதங்களாக வேலைநிறுத்தம் செய்து வந்தனர்.

இதற்கிடையில் தண்டரை கிராமத்தில் உள்ள அங்கன்வாடி மையத்தில் தலித் குழந்தைகளை சேர்ப்பதில்லை என்றும் புகார் எழுந்தது.

இச்சம்பவங்கள் குறித்து மாவட்ட வருவாய் அலுவலர் மற்றும் கோட்டாட்சியருக்கு புகார் மனு அளித்தும் எவ்வித நடவடிக்கையும் எடுக்கப்படவில்லை.

இந்நிலையில் சில தினங்களுக்கு முன்பு மீண்டும் இரு தரப்பினருக்கும் மோதல் ஏற்பட்டது.

இதில் ஆதிக்க சாதியினர், தலித் பகுதிகளுக்குள் புகுந்து தாக்குதல் நடத்தினர். இதில், அலமேலு (55), உமையாள்(65) ஆகிய இருவர் க்கு பலத்த காயம் அடைந்தனர். அவர்கள் செங்கல்பட்டு அரசு மருத்துவமனையில் அனுமதிக்கப்பட்டு உள்ளனர்.

மருத்துவமனையில் சிகிச்சை பெற்று வரும் தலித் மக்களை தீண்டாமை ஒழிப்பு முன்னணியின் காஞ்சிபுரம் மாவட்ட அமைப்பாளர் ப.சு.பாரதி அண்ணா, வாலிபர் சங்க மாநிலத் துணைச் செயலாளர் இல.சண்முகசுந்தரம், மாவட்டத் தலைவர் முனுசாமி, நந்தன் உள்ளிட்டோர் பார்வையிட்டு ஆறுதல் கூறினர்.

இதற்கிடையில் விடுதலைச் சிறுத்தைகள் அமைப்பு சார்பில் காவல் நிலையம் முற்றுகையிடப்பட்டது.

இந்த பிரச்சனை குறித்து இரு தரப்பினர் மீதும் செய்யூர் காவல்நிலையத்தில் வழக்கு பதிவு செய்யப்பட்டது. ஆதிக்க சாதியை சேர்ந்த பஞ்சாயத்து தலைவர் உட்பட 5 பேரையும், தலித் மக்கள் சிலரையும் காவல் துறையினர் கைது செய்தனர்.

இந்த கிராமத்தில் ஏற்பட்டுள்ள பதட்ட நிலைக்கு மாவட்ட நிர்வாகத்தின் அலட்சியப் போக்கே முக்கிய காரணம் என்று தீண்டாமை ஒழிப்பு முன்னணி குற்றம் சாட்டியது.

இந்த பகுதியில் தீண்டாமை கொடுமைக்கு எதிராக மாவட்ட ஆட்சியரும் தமிழக அரசும் உடனடி யாக தீர்வு காண வேண்டும் என்றும் தீண்டாமை ஒழிப்பு முன்னணி வலியுறுத்தியது.

காட்டுக்கீரை பறித்த தலித் பெண்கள் மீது தாக்குதல்

கோவை துடியலூர் அருகே உள்ளது பன்னிமடை ஊராட்சி. இங்குள்ள கொண்டல்சாமி நகரில் கவிதா, துளசிமணி, தெய்வானை ஆகியோர் வசித்து வருகின்றனர்.

அருந்ததியர் சமூகத்தைச் சேர்ந்த இவர்கள் அப்பகுதியில் உள்ள செங்கல் சூளையில் வேலை செய்து வருகின்றனர். இந்நிலையில் கடந்த சில நாட்களாக கடும் மழை பெய்து வந்ததால் செங்கல் சூளைகள் இயங்கவில்லை. இதனால் அவர்களுக்கும் வேலையில்லை.

எனவே திங்களன்று (16.11.09) மாலை உணவுக்காக காட்டுக்கீரை பறிக்கச் சென்றனர். அவர்கள் கீரை பறித்துக் கொண்டிருந்த போது அப்பகுதியில் உள்ள வாழைத் தோட்டத்தின் உரிமையாளர் கோபால் (எ) ராஜகோபால் அவர்களது சாதியைக் குறித்து இழிவாகப் பேசியதுடன் கையில் வைத்திருந்த தடியால் மூன்று பேரையும் கண்மூடித்தனமாக தாக்கியுள்ளார்.

இதில் படுகாயம் அடைந்த தலித் பெண்கள் மூவரும் சிகிச்சைக்காக கோவை அரசு மருத்துவக் கல்லூரி மருத்துவமனையில் அனுமதிக்கப்பட்டனர்.

இதுதொடர்பாக கவிதா துடியலூர் காவல்நிலையத்தில் புகார் அளித்தார். இப்புகாரின் பேரில், போலீசார் முதலில் சாதாரண பிரிவுகளில் வழக்குப்பதிவு செய்தனர்.

இந்நிலையில் தகவலறிந்த தீண்டாமை ஒழிப்பு முன்னணியின் மாவட்ட நிர்வாகி வி.பெருமாள் தலையிட்டு பேசியதையடுத்து வன்கொடுமை தடுப்புச்சட்டத்தின் கீழ் போலீசார் வழக்குப்பதிவு செய்தனர்.

கொங்குநாடு
இந்நிலையில் தலைமறைவாக உள்ள ராஜகோபாலுக்கு ஆதரவாக கொங்குநாடு முன்னேற்றப் பேரவையினர் வியாழனன்று இரவு துடியலூர் காவல்நிலையத்தை முற்றுகையிட்டனர். பின்னர் தோட்டத்தில் பெண்கள் காய்கறி, கீரை மற்றும் பழங்களைத் திருடியதாகப் புகார் அளித்துள்ளனர்.

தீண்டாமை ஒழிப்பு முன்னணி ஆறுதல்
இந்நிலையில் வெள்ளியன்று தீண்டாமை ஒழிப்பு முன்னணியின் தலைவர்கள் கோவை அரசு மருத்துவமனைக்குச் சென்று பாதிக்கப்பட்ட பெண்களை நேரில் சந்தித்து ஆறுதல் தெரிவித்தனர். முகாம் மருத்துவரை அணுகி அவர்கள் சிகிச்சை விபரங்கள் குறித்தும் கேட்டறிந்தனர். பின்னர் தீண்டாமை ஒழிப்பு முன்னணியின் கோவை மாவட்ட அமைப்பாளர் யு.கே.சிவஞானம் தெரிவித்ததாவது:

“தலித் பெண்களை ஆதிக்க வெறியோடு தாக்கிய ராஜகோபாலை போலீசார் உடனடியாக கைது செய்ய வேண்டும். இதுகுறித்து தீண்டாமை ஒழிப்பு முன்னணி தொடர் நடவடிக்கைகளில் ஈடுபடும்’’ என்றார்.

சந்திப்பின் போது அமைப்பின் மாவட்ட நிர்வாகிகள் வி.பெருமாள், என்.ஜாகீர், மார்க்சிஸ்ட் கட்சியின் பெரியநாயக்கன்பாளையம் ஒன்றியச் செயலாளர் ஆர்.கேசவமணி உள்ளிட்டோர் உடனிருந்தனர்.

சென்னை கோட்டை நோக்கி தலித்- பழங்குடி மக்கள் நாளை உரிமைப் பேரணி

சென்னை கோட்டை நோக்கி தலித்- பழங்குடி மக்கள் நாளை உரிமைப் பேரணி
சென்னை, அக். 25 -தமிழ்நாடு தீண்டாமை ஒழிப்பு முன்னணியின் சார்பில், தலித்- பழங்குடி மக்களின் உரிமைப் பேரணி, சென்னை கோட்டை நோக்கி அக்டோபர் 27- செவ்வாயன்று நடைபெற உள்ளது. மன்றோ சிலையிலிருந்து காலை 10 மணியளவில் பேரணி புறப்படுகிறது. நிறைவாக சேப்பாக்கம் விருந்தினர் மாளிகை அருகில் கூட்டம் நடைபெறுகிறது.பேரணி மற்றும் கூட்டத்தில், அகில இந்திய விவசாயிகள் சங்கத்தின் பொதுச்செயலாளர் கே.வரதராசன், மார்க்சிஸ்ட் கம்யூனிஸ்ட் கட்சியின் மாநிலச் செயலாளர் என்.வரதராஜன் மற்றும் சிஐடியு மாநில பொதுச்செயலாளர் அ.சவுந்தரராசன், தீண்டாமை ஒழிப்பு முன்னணியின் மாநில அமைப்பாளர் பி.சம்பத், தமிழ்நாடு மலைவாழ் மக்கள் சங்க பொதுச் செயலாளர் பெ.சண்முகம், சிபிஎம் சட்டமன்றக்குழுத் தலை வர் கே.பாலபாரதி, பெரம்பூர் தொகுதி சட்டமன்ற உறுப்பினர் கே.மகேந்திரன், ஆதித் தமிழர் பேரவை நிறுவனர் இரா. அதியமான், அருந்தமிழர் விடுதலை இயக்க மாநில அமைப் பாளர் கு.ஜக்கையன், ஊரக வளர்ச்சி உள்ளாட்சித் துறை ஊழியர் சங்க பொதுச்செயலாளர் கே.ஆர்.கணேசன், டாக்டர் அம்பேத்கர் பேரவை தலைவர் சி.நிக்கோலஸ், அருந்த தியர் மகாசபைத் தலைவர் எம்.மரியதாஸ், “களம்” அமைப்பாளர் பரதன், ஆதித் தமிழர் விடுதலை முன்னணி அமைப்பாளர் கோவை ரவிக்குமார், தமிழ்நாடு ஆதி ஆந்திரா அருந்ததியர் மகாசபைத் தலைவர் கே.ஆர்.நாகராஜன், அம்பேத்கர் கிராம மக்கள் மனித உரிமை இயக்கத் தலைவர் சுப்பு, புரட்சிப் புலிகள் இயக்க அமைப்பாளர் எஸ்.கே.பழனிச்சாமி, நவஜீவன் டிரஸ்ட் இயக்குநர் நளன், அருந்ததியர் ஜனநாயக முன்னணி பொதுச்செயலாளர் எம்.கௌதமன், அருந்ததியர் விடுதலை முன்னணி தலைவர் தண்டபாணி, தமிழ்நாடு வெட்டியான்கள் சங்கத் தலைவர் எஸ். ரங்கசாமி, மாநில ஆலோசகர் எஸ்.எஸ்.மாயமலை, தீண்டாமை ஒழிப்பு முன்னணி தென்சென்னை மாவட்ட அமைப்பாளர் எஸ். செல்லையா, முன்னணியின் வடசென்னை மாவட்ட அமைப்பாளரும், திருவொற்றியூர் நகர்மன்றத் தலைவருமான ஆர்.ஜெயராமன் உள்ளிட்ட தலைவர்கள் பங்கேற்கின்றனர்.கோரிக்கைகள்மக்கள் தொகைக்கு ஏற்ப, தலித் மக்களுக்கான இடஒதுக்கீட்டை 18 சதவீதத்திலிருந்து 19 சதவீதமாக உயர்த்த வேண்டும்; பாதாளச் சாக்கடைகளை அகற்ற, மனிதர்களை பயன்படுத்தாமல், நவீன கருவிகளைப் பயன்படுத்துவதற்கான அரசாணை வெளியிட வேண்டும்; வெட்டியான்களை மயான உதவியாளர்கள் என பெயர் மாற்றம் செய்து, உள்ளாட்சி ஊழியராக்க வேண்டும்; ஒண்டிவீரனுக்கு மணிமண்டபம் அமைக்க வேண்டும்; அரசுப் பணிகளில் தலித்- பழங்குடியினருக்கான பின்னடைவு காலியிடங்களை தாமதமின்றி நிரப்ப வேண்டும்; அவர்களுக்கான சிறப்பு உட்கூறு திட்டத்திற்கு மக்கள் தொகைக்கு ஏற்ப துறை வாரியாக நிதி ஒதுக்கி முழுமையாக செலவு செய்ய வேண்டும்; தலித் மக்களுக்கு ஒதுக்கப்பட்ட பழுத டைந்த குடியிருப்பு மற்றும் தொகுப்பு வீடுகளை பழுதுநீக்க வேண்டும்; தலித் மக்களுக்கு நிலம் மற்றும் குடிமனைப் பட்டாக்கள் வழங்க வேண்டும்; பஞ்சமி நிலங்களை மீட்டுக்கொடுக்க வேண்டும்; பழங்குடி மக்க ளுக்கான வன உரிமைச் சட்டத்தைச் செயல்படுத்த வேண்டும்; ஆலயங்களில் தலித்துக்களுக்கான உரிமையை நிலைநாட்ட வேண்டும்; வன்கொடுமைச் தடுப்புச் சட்டத்தை உறுதியாக அமல்படுத்த வேண் டும்; விடுபட்ட அருந்ததியர் பிரிவினரையும் உள்ஒதுக் கீட்டிற்கு கொண்டுவந்து அதன் அளவை உயர்த்த வேண்டும் என்பன உள்ளிட்ட கோரிக்கைகளை வலியுறுத்தி இந்த உரிமைப் பேரணி நடைபெறுகிறது.